Tannálfurinn kom í heimsókn

Nú kom að því að drengurinn missti tönn af náttúrulegum hætti, þ.e. ekki af slysförum. Björgvin missti báðar efri framtennur 1. febrúar á þessu ári þegar hann datt á leikskólanum. En nú losnaði ein neðri framtönn af sjálfsdáðum og var mikil dramatík í kringum það. Björgvini fannst ekki þægilegt að hafa hana svona laflausa og var hræddur um að það yrði sárt þegar hún dytti. Svo datt hún daginn eftir og hann var alsæll að vera orðinn svona stór!

Annars er hann búinn að vera nokkuð hress og kátur, gengur vel í leikskólanum. En hann borðar ekki vel og þyngist ekkert og er það í rauninni það eina sem gengur ekki vel, þrátt fyrir að vera á vaxtarhormónum. Næsta skref í ferlinu er að hann fái magasondu og verður sú aðgerð gerð 11. okt næstkomandi. Það fylgir þessu mikill kvíði þar sem erfitt er að svæfa hann og oft koma sýkingar í kjölfarið í lungun, þó svo að aðgerðin sjálf sé auðveld. En maður ber þá von í brjósti að um leið og hann fær næga næringu þá muni eitthvað gerast í fjölgun sentimetra :)

Björgvin Arnar er mikill listamaður og teiknar á töfluna sína á hverjum degi, unir sér svo vel við það og svo sýnir hann okkur listaverkin sín. Þetta teiknaði hann um daginn, hvernig honum datt í hug að gera tölustafina svona öðruvísi er flott og hugmyndaríkt.

Kær kveðja úr Svölutjörn
Ásdís og Björgvin Arnar